قد يتوهم البعض و بالاخص التطوريون ان ظهور الانسان جاء نتيجة عدة مراحل تطورية حتمية حدثت لبعض انواع القردة العليا و بمرور الاجيال وصلنا الي هذا الكائن الناطق المفكر ( الانسان ) ! لكن ما لم يشهده دارون و رسل و ماركس وغيرهم من عمالقة تنظير الإلحاد , هي تلك الطائفة العجيبة من البشر المبرراتية ذات الاصول المجهولة حيث لم تفلح دراسة علمية واحدة في التوصل الي اصول هذة الطائفة .. حتي شاء القدر ان يلهم عقلي المتواضع الي هذة الاصول المجهولة !
ايها السادة .. لقد وجدتها ,, وجدت ان هذة الطائفة المبرراتية لها نفس ذات الاسلاف المشتركة التي تطور القطاع الاكبر منها عبر الاجيال المتعاقبة لتصبح علمياً ( أوفيس أريـس ) او كما يقال عنها بالعامية والفصحي ( خرفان ) ! لكن القطاع المتنحي جينيا هو الذي انجب لنا هذة الطائفة التي ظلت متوارية عبر ملايين السنين , حتي جاءت الثورة التي لم تكن سياسية فحسب لكنها جينية ايضاً فحدثت الطفرة اللعينة التي ادت الي تحويل هذة الصفة من ( المتنحية ) الي ( السائدة ) ! انني اكاد اجزم ان عمنا دارون لو كان شاف هذة المخلوقات لربما خالف ثوابت التصنيف العلمي للحيوانات و اصر علي ان اصل الانسان ( خروف ) مش ( قرد ) .. فبرغم التشابه الشكلي بين الانسان و القرد و كذلك التشابه التصنيفي ,, الا ان هذة الظاهرة هدمت كل الثوابت العلمية !
فمن المعروف و الثابت علمياً ان تصنيف الخروف هو كالتالي
مملكة / الحيوان - شعبة / الحبليات - طائفة / الثدييات - رتبة / شفعيات الاصابع - فصيلة / البقريات
بينما تصنيف الانسان ( هومو سابيين ) هو
مملكة / الحيوان - شعبة / الحبليات - طائفة / الثدييات - رتبة / الرئيسيات - فصيلة / القردة العليا
لكن التطابق السلوكي بين ابناء طائفة المبرراتية و عشيرة الخرفان من سمع و طاعة و انقياد و انصياع للقائد و التبرير الاعمي هو ما جعلني اعيد النظر في هذا التصنيف ! بل ربما لم اعتد به من الاساس .. فهم خرفان خرفان خرفان
معلش طولت عليكم في الهري العلمي دا كتير .. ندخل في المفيد , مبدئيا لازم نتفق علي التسمية اللي توصلت لها لهذة الطائفة المبرراتية الا و هو ( الخرفان الآدمية ) .. ! فهو خروف سلوكياً و انسان بيولوجياً
الخرفان الآدمية نوعين من حيث التشخيص ! النوع الاول ( سهل التشخيص ) .. النوع الثاني ( معقد التشخيص ) .. و انا بصراحة مقعدتش اكتب المقال دا عشان اعرفك ازاي تعرف النوع الاول .. بس برضة من باب التذكير ,, النوع الاول هو ( اللي من قبل ما تكلمه بتكون عارف انه خروف , و دا اللي بيعلن من اولها انه اخوانجي , شكراً "اعرف صاحبك و علم عليه" ) .. طب النوع التاني دا اعرفه ازاي ؟!
صعوبة تشخيص النوع دا , انه دايما بينكر انه اخوانجي , و صاحب جملة اثرية لازم يبدأ او يختم بها كلامه معاك ( بس انا مش اخوان ) .. خد بالك : مش معني ان اللي قدامك قال الجملة دي انه فعلا خروف مستتر .. لأن اختلافك الايديولوجي مع الاخوان مش هيمنعك من الاتفاق معاهم في موقف او اتنين .. فانت كمان ممكن تكون قولت الجملة دي او ما شابه في موقف قبل كدا
و بناءاً عليه .. انت دلوقتي قدامك و حصريا الخطة الخمسية الذهبية لاكتشاف الخرفان معقدة التشخيص :ـ
1
انتقد اي حد من رموز المعارضة , و خلي انتقادك له مبني علي وجهة نظر الاخوانجية له .. و راقب رد فعله
مثلاُ .. 1- البرادعي : قول عليه خرب العراق , ليبرالي هيساعد علي الانفلات الاخلاقي و نشر الخلاعة ايماناً منه بمبدأ الحريات الشخصية المطلقة , علماني بيكره الاسلام و الشريعة ! متجوز شيعية ! بنته ملحدة و بتتصور بالبكيني ! جوز بنته مسيحي ! بيتمول من امريكا من منظمات ماسونية صهيونية ! ( اي هري من اشاعاتهم الحمضانة دي ) و مفيش مانع لو قولت عنه ( عم شكشك , تويتر مان , بردعة ) و شوف رد فعله ,, لأنه بنسبة 100% هيجيب معاك
مثال تاني .. 2- حمدين صباحي : قول عليه اشتراكي يعني شيوعي ! بيناقض نفسه عشان مصلحته ! معارض ممول ايام النظام السابق و مكنش له لازمة ! عايز يركب الكرسي و خلاص بأي طريقة ! كان صحفي فاشل و معرفش يدير جريدة حزبية , هيعرف يدير بلد ؟ ! و برضة مفيش مشكلة لو قولت عنه ( حمضين , واحد خمنا , واخد مننا , مسائي ) و اللي يقدرك ربنا عليه و تفتكره , قوله ,, و شوف برضة رد الفعل , لان نفس النتيجة متوقعة
و عندك شخصيات عامة كتيرة ممكن تكلمه عنها و تنتقدها له من نفس وجهة النظر الاخوانجية مثلا ( احمد زويل , ممدوح حمزة , باسم يوسف , يوسف الحسيني , وائل الابراشي , خالد يوسف , حازم عبدالعظيم ,,,, قدامك القوس مفتوح و كمل براحتك
2
جيب سيرة الحراق اوي ( جمال عبدالناصر ) !! او الحراق نص نص ( السادات ) .. و راقب رد فعله
بس متنساش , لما تيجي تتكلم عن عبدالناصر , لازم تقول انه كان ديكتاتور عسكري و سفاح و صفي معارضيه و اضطهد الاخوان و تحالف مع الاتحاد السوفيتي ( الشيوعي الملحد ) .. ! و ساب البلد خربانة و محتلة !! و برضة مفيش مشكلة لو اتكلمت عن الشهيد ( سيد قطب ) ... كل دا هيجيب معاه جـااامـد , و هتلاقيه بيدوس معاك بنسبة 101% .. انت مش متخيل حجم جلاشة عبدالناصر لهم كانت عاملة ازاي ؟
لو حبيت تتكلم عن الحراق نص نص ( السادات ) .. لازم تخون فيه و في كامب ديفيد و الانفتاح الاقتصادي و الفساد الاداري و المالي في الدولة ! و تفرده بالسلطة .. انه كان يستاهل الاغتيال ! و النتيجة مضمونة
3
اتكلم عن اي مشكلة في البلد , و ارمي اللوم فيها ع الشعب اللي لازم يصلح من نفسه الاول و المعارضة اللي عايزة العجلة تقف و الفساد اللي ضرب في كل حتة في البلد و النظام القديم اللي نهب مواردها و اوعي تنسي المخطط الصهيوصليبي الشيعي الماسوني , و اخلق الاعذار من بطن الارض لـمرسي و جماعته و اهله و عشيرته , و اكيد هيجيب معاك
مثال للمشكلات المقترحة ( المواصلات - الامن - البنزين - العيش - الاسعار - النظافة ,, و القوس مفتوح
4
عليك و علي ( الخرفان الكبار ) اللي لازم تعمل منهم ابطال قوميين و تاريخيين ! و اليك بعضهم علي سبيل المثال لا الحصر
البلتاجي : بطل ثورة 25 يناير و قائد ميلشيات حماية الميدان و الثوار في موقعة الجمل
العريان : السياسي المحنك و المعارض الداهية ايام مبارك
الكتاتني : ذو العقلية الألمعية الرشيدة في برلمان الثورة المنحل ,, ( اجلس مكانك ) احسن اقعدك
الشاطر : الطالب الثوري المعارض للسادات اللي اعتقل اكتر ما نام مع مراته , و المهندس و رجل الاعمال الوطني المضطهد من ابناء مبارك و نظامه الفاسد و هو ايضا صاحب الدعوات المستجابة علي رأي بديع
بـديع : الامام الورع و المرشد التقي , الحكيم , المتعقل , ذو الخلق الدمث , و اي حمادة بالجنزبيل هيجيب معاه
5
التمويل و ما ادراك ما التمويل ؟
الجماعة الوحيدة التي لا يعلم مصدر تمويلها الا الله علي مدار 8 عقود ,, يجب ان تتهم الجميع انهم ممولون من اطراف خارجية و داخلية متآمرة ! فبناءاً عليه , لازم تقول له : 6 ابريل ممولين و ماسونين ! شباب الثورة ممولين ! البرادعي ممول ! حمدين ممول ! اليساريين الشيوعيين ممولين ! اليساريين القوميين برضة ممولين ! الليبراليين ممولين ! الاعلام الفلولي الفاسد بتاع قوم لوط ممول ! و لو عرفت تلسع السلفيين كمان يبقي تمام , بس ابقي خلي بالك في لسعة السلفيين دي بالذات .. المهم ,, تيجي عند الاخوان و تنفخ في تبرعاتهم و تمويلهم الذاتي و انهم اصحاب مبدأ و بيصرفوا علي جماعتهم من جيوبهم و بيقطعوا من قوت عيالهم من اجل الرسالة و الخ الخ .. و وش برضة هيجيب معاك
كدا يعتبر ,, انت معاك الوصفة السحرية الحصرية , لاكتشاف الخرفان معقدة التشخيص ,, يتبقي اني اقولك ان الخرفان المستترة نوعين .. نوع خرفاني اصلي , و نوع خرفاني مهجن .. و الاصلي دا اللي انتخب مرسي في المرحلتين , اما المهجن هو اللي انتخب ابو الفتوح في المرحلة الاولي و بعدين من غير ليمون انتخب مرسي
و لو حبيت تعرف اللي قدامك من اي نوع ,, ما عليك الا طرح موقف ابوالفتوح من الدستور .. حينئذ هتكشتف النوع فوراً
لو عجبـــك المقـــال ,, شــيــر فـ الخــيــر علي اوســع نطــاق حتي تعم الفائدة ,, و لا تنس متابعة المدونة حتي يصلك كل جديد من مقالات و تدونيات