" مواجهة الاعتقال أشرف مما يسمي يسار الوسط "
( شعاري في المرحلة المقبلة تحت حكم المرشد او الفشيق )
Thursday, May 31, 2012
Wednesday, May 30, 2012
Monday, May 28, 2012
ليه مينفعش غير حمدين
ليه مينفعش انتخب غير حمدين صباحي ؟
الفرق بين حمدين و غيره من المرشحين
حمدين المرشح الوحيد اللي نزل مع الشباب في التحرير يوم 25 يناير -
كان فين الاستبن و الجزمة , اليوم دا ؟ #
! الاستبن : كان زي الطرطور راقد ع البيض في مكتب الارشاد لانه ميقدرش يخالف اوامر المرشد
! الجزمة : كان باختصار , من اعضاء الحكومة اللي كان اول مطلب للشباب اسقاطها
حمدين المرشح الوحيد اللي اعتقل 17 مرة .. عشان العدالة الاجتماعية .. عشان الفقراء و الفلاحين -
ايه وضع الاستبن و الجزمة من الاعتقال ؟ #
الجزمة : و لا عمره يعرف يعني ايه معتقل ... هو يسمع الاسم بس تقريبا
حمدين ابوه الحاج عبد العاطي فلاح بسيط , و له من الاشقاء 11 ! هو الوحيد اللي واصل تعليمه العالي -
- حمدين انتخب بارادة شعبية حرة نزيهة لدخول مجلس الشعب ليكون سند للفقراء و صوت لهم , رغم محاولات كلاب الوطني و الداخلية اسقاطه ... لكن فلاحين بلطيم و البرلس الجدعان ارتضوا يموتوا ع الصناديق عشان ابنهم يوصل المجلس و يعبر عنهم و كان التمن دمهم و اعتقال بعضهم !
حمدين اول مرشح اقر ذمته المالية علناً ... و طلع كل اللي يمتلكه لا يتعدي الـ 100 الف جنية , و بيدير حملته باموال تبرعات المتطوعين من الشباب و اهالي الشهداء و المصابين و مؤيديه باختلاف طوائفهم و طبقاتهم , و هي اقل الحملات صرفا مقارنة بما جمعته من اصوات !
#الاستبن : كله من فلوس الجماعة , و ربنا يزيد و يبارك , مواد تموينية تلاقي , لحوم تلاقي , انابيب غاز تلاقي , مؤتمرات تلاقي , اتوبيسات تلاقي , مواد دعائية ببذخ تلاقي ,,, انا مش بحسد انا بقر بس ع الـ100 مليون اللي سمعت انهم مخصصين لتمويل الحملة , و الله اعلم بالباقي
#الجزمة : كله من فلوس الوطني المنحل , اللي بيمثل له الامل في الرجوع , و طبعا الفلوس دي فلوسنا احنا , اللي بيعمل بها دعاية عشان يخدع البسطاء فيه و يبيعوا دمهم و دم ولادهم . دا ابليس هيجي يتعلم منك !
حمدين هو رمانة الميزان الوحيد المناسب للفترة القادمة .. حيث ان فوز الاستبن او الجزمة سيكرس للحزب الوطني و سيطرة التيار الواحد و الاحتكار السياسي مرة اخري ... شفيق ممثل الوطني المنحل الحالم بالعودة ! مرسي ممثل الوطني الانتهازي الحالم بالصعود ! كلاهما رأسماليين سيقوم حكمهم ع عظام و دماء البسطاء من هذا الشعب لمصلحة الفئة اللي دايما منفضانا
مش محتاج اقولكوا برضة ان الجزمة كان سافك دم ... و الاستبن عاونه و استهان بحرمته عشان مصالح جماعته
كل دي اسباب و اكتر تخليني انتخب حمدين صباحي و اناصره لحد اخر يوم في عمري كمرشح الثورة الحقيقي ... مش فل هدفه قتل
ثورتنا و لا انتهازي ملوش غير مصلحته !
عمري ما هقبل يكون صوتي لاستبن او جزمة ... عشان ثورتي يبئا لها لازمة
عيش .. حرية .. كرامة انسانية
Sunday, May 27, 2012
الاقباط ام الاخوان ؟
المقال دا بتاريخ 27-5-2012
و دا اول مقال هكتبه بالعامية تقريبا , لانه من بعد كدا مفيش داعي للفصحي .. فبالفصيح كدا احنا تقريبا لبسنا عشان نازلين كلنا .. نازلين فين ؟ متسألوش دلوقتي , عشان هتعرفوا في الاخر
طبعا مش محتاج اتكلم كتير ع شعوري و خيبة الامل و الصدمة اللي بمر بها , انا و جيل كامل و طبقات عريضة من الشعب كان كل حلمنا نكلل ثورتنا برئيس مننا يكمل المشوار اللي بدأناه في 25 يناير 2011 ,,, رئيس كان معانا من بداية اليوم دا , و من قبل كدا كمان , كان بيحارب و يناضل ضد نظام آل طاغوت اللي مص دمنا و اكل قوتنا و استباح اعراضنا , رئيس يقدر يخلي ام الشهيد لاول مرة تنام مرتاحة عشان حق ابنها رجع اخيرا , رئيس مننا , رئيس مش زعيم
و بما اني شخصيا كنت و ما زلت مؤيد للمناضل حمدين صباحي و سأبقي متضامنا معاه قلباً و قالباً حتي يتم النصر من عند الله , لكن خلوني اكون مشاغب شوية و اسيب لعقلي الزمام عشان يتسأل عن اسباب الخابور اللي ضرب في نافوخنا كلنا و ادي الي صعود الفشيق الي مركز التاني حسب الاحصائيات المعلنة حتي الان ( مع العلم ان مركز كارتر لمراقبة الانتخابات و هو جهة دولية محايدة اعلن حسب احصائيات مندوبيه ان المركز التاني يؤول لحمدين مش الفشيق ) بس برضة ليه الفشيق خد كل الاصوات دي ؟
خلوني برضة ابعد عن التحليلات العقيمة اللي بتعتمد ع التقسيم الفئوي للطبقات الكبيرة اللي اصطفت في الطوابير للتصويت للسلم , مش عشان ابعد الكرة عن ملعب " الاقباط " و لا " العسكر " , لكن لعدم اقتناعي الشخصي بالمبدأ دا من التقسيم
لانه من خلال شغلي كمتطوع في الحملة ... اكتشفت عملياً مدي سطحية هذا النوع من التقسيمات .. و دا بناءاً ع شغل في الشارع مش بالورقة و القلم في مكتب مكيف و لا استوديو و اي كلام بيتقال يا عبدالعال !
زي ما كان في افراد شرطة من مصلحتهم انتخاب الفشيق .. كان في كتير من عائلاتهم انتخبوا حمدين .. و شباب مجندين .. و افراد امن مركزي .. و زي ما كان في اقباط توجهوا من خلال الدعاية الغير نزيهة لبعض افراد المؤسسة الكنسية لانتخاب الفشيق .. كان اغلب الاقباط شرفاء بيرفضوا النوع دا من التوجيه و الاتجار بالدين و انتخبوا حمدين و في منهم اللي انتخب عمرو موسي و ابو الفتوح كمان ! و من الشباب في اللي راحوا انتخبوا ابو العز و خالد علي ! و في من البسطاء اللي انتخبوا الميزان !!! بل و لاقيت عدد كبير من الملتزمين اللي انتخبوا الاخوان في البرلمان نزلوا صوتوا للفشيق و العوا و حمدين !!! متستغربوش , حصل حصل , و الاكتر من كدا , شباب الثورة اللي انتخبوا عمرو موسي عن قناعة تامة !!!
المهم , نرجع لموضوعنا في البحث عن اسباب صعود الفشيق
1#
القيادة الرشيدة للمجلس العسكري خلال الفترة الانتقامية للثورة المضادة , و النجاح الباهر اللي حققوه في تكفير الطبقات المهمشة و الوسطي بل و المستغلة كمان بالثورة تماماً ! و محاكاة النموذج الروماني بشكل يعجز الكلام عن وصفه ... فكان من الطبيعي ان العامل و الفلاح و الموظف و البيه و الباشا , ينزلوا ينتخبوا اللي يقدر يرجع النظام نسبيا اللي شايفين فيه المعني المتجسد للاستقرار و القضاء علي الانفلات الامني
سمعتها كتير ( منهم لله الشباب خربوا البلد .. عايزين البلد تستقر بئا زهقنا ) ... دا غير الكلام اللي يحرق الدم لما يشتموا الشهداء و المصابين ! , و ميهونش عليا احرق دمكوا بسرد مشاهد و مواقف تانية حصلت قدامي
2#
مدام نزيهة بتاعة الانتخابات ... اللي بنلبس بفضل نفسها اللي معانا كل مرة , عشان ننزل نعترض ع نتائج التصويت
يكفي ان في لجان من لجان تصدر الفشيق بالغربية .. كان عدد الاصوات الصحيحة اكتر من عدد المقيدين باللجنة !
يكفي كمان اسماء المتوفين اللي بعون الله لسة مقيدين بالكشوف الانتخابية ... و محتمل يكونوا نزلوا شاركونا الكرنفال الديمقراطي الجميل :) هو كان جميل بعقل ؟
يكفي كمان اسماء افراد الشرطة و الجيش المقيدة بالكشوف الانتخابية بعد تغيير الصفة المهنية ... حد قال ان كان في تزوير ؟ تشكرات مدام نزيهة
يكفي الاخوة المواطنين المنايفة اللي طلع لهم بقدر قادر اكتر من رقم قومي !
يكفي بطاقات التصويت اللي كان متعلم فيها حمدين و وجدت ملقاة خارج احد اللجان بالصعيد !
طبعا كتير مش هيصدقوني و يقولوا دي اتهامات باطلة ,, احب اقولهم .. طالما شاربين مقلب مدام نزيهة .. يبئا ملوش لازمة النقاش اساساً
3#
مش هنقول شراء اصوات .. بس لما تلاقي عربيات نقل محملة خرفان ( اقصد بني ادميين ) كلهم نازلين يملوا طابورين قدام اللجنة عشان ينتخبوا السلم .. يبئا اكيد الصوت مكنش اقل من 100 جنية ! و كلها مخالفات رصدها مراقبي الحرية و العدالة و غيرهم !
4#
شفيق بصفته طيار عظيم و عمل مطار القاهرة و راجل معدي الـ70 .. عيب اوي نشوه سمعته و نقول عليه اتهامات باطلة بل و نرميه بالجزم !! فين القيم اللي اتربينا عليها يا شعب ؟؟ فين اخلاقنا يا مؤمنين ؟؟ دي لوحدها مادة خصبة للاعلام الدنيئ للتلميع في صورة فل الفلول الفشيق و خلق حالة من التعاطف الشعبي معاه ... اضف لذلك اننا شعب طيب و نساااي !!! و البس يا شعب عشان نازلين تاني
5#
الساكت عن الحق شيطان اخرس ... و الدال ع الحق كفاعله , كلها مبادئ مؤمنين بها , و بالتالي لما تلاقي الاخوان بعدد مراقبيهم المهول ع الانتخابات و عدد الخروقات و المخالفات الصارخة اللي ارتكبها الفشيق و حملته , متقدموش بطعن واحد ضد الفشيق ... دا له تفسير من اتنين , اولهم انهم خايفين ع نفسهم عشان الخروقات اللي ارتكبوها هم كمان و القضاة الاخوانجية اللي وجهوا بعض الناخبين و الاصوات اللي اشتروها بالزيت و السكر و الانابيب ! و تانيهم انهم محتاجين مرشح ضعيف الشعبية زي الفشيق عشان يروجوا للدعاية الانتهازية بتاعتهم و يتمحكوا في اسم الثورة و يحطوا الخيار امامنا ( ضياع الثورة او عدم بيع الثورة ) و يصوروا المعركة ع انها معركة ضد الفلول بس و بالتالي يكسبوا تعاطف بعض القوي الثورية الساذجة و التي قد تعاني من مرض الانتهازية مثلهم , و عجبي ع اللي رضيوا يبيعوا الثورة اكتر من مرة و لسة البعض بيتخيلهم قوي وطني
6#
اخيرا و ليس اخرا ... قانون العزل السياسي ( عزل الفلول ) اللي انتخ عليه الاخوان منذ توليهم زمام المجلس في يناير2012 و اللي كان من المطالب الشعبية لثوار التحرير في يناير2011 .. و كان من المأمول انه يكون من اولويات برلمان الثورة المنتخب بأرادة شعبية .. لكن للاسف دا طلع منتخب الساجدين و المعرضين للعسكر .. و ع رأي رامي عصام ( اضحكوا يا ثورة ) .. !! اللي يفقعك بئا انهم قعدوا يناقشوا مضاجعة الوداع و سن الزواج و حد الحرابة لحد ما لاقوا العسكر بينزل بكارت البعبع الكبير عمر سليمان في اخر يوم من فتح باب الترشح للانتخابات الرئاسية .. و افتكروا ذكرياتهم الاليمة في معتقلات المخابرات و امن الدولة .. ففي لمح البصر فصلوا القانون اللي مليان عوار دستوري و قدموه بعد فوات الاوان .. و طبعا بفضل الانتخة المعهودة من المؤسسة القضائية و المحكمة الدستورية بات من المستحيل استبعاد الفشيق قبل يوم 21 يونيو !!! , يعني بفرض فوز شفيق في الانتخابات و تصديق الدستورية ع القانون ( و دا شبه مستحيل ) فيما بعد اعلانه رئيساً رسمياً منتخباً .. هنكون لبسنا الاستبن مش الجزمة ! متسألوش اين اشيائكوا
عايز بئا بعد كل دا .. حد محترم يطلع يقول لي : انتخب الاستبن عشان الثورة متضيعش و يرجع النظام !
النظام هيفضل موجود لكن بديكور بغيض بسيط هو تحويل الوطني المنحل الي وطني بدقن ... حسبة بسيطة بالعقل ( الاخوان معاهم السلطة التشريعية .. و بفوز الاستبن هياخدوا التنفيذية كمان .. و باستقطاب ديني و مصلحنجي للقضاه يبئوا استولوا علي السلطات الثلاثة في الدولة .. يعني استولوا ع البلد .. يعني مبروك علينا الحزب الوطني الاسلامي .. و دي يا ولاد كانت حكاية ثورة 25 يناير اللي عملها شباب و سرقها تجار الدين ) ... و بالتالي المعارض يكون مش خاين و عميل و مثير للفوضي بس , لكن كافر و زنديق و محارب لشرع الله ! يااااه عرفنا نفلت من نموذج الفشل الروماني للثورة ... عشان نطبق النموذج الايراني
متنسوش كمان ان الفشيق هو اللي كان مسئول وقت موقعة الجمل ... لكن الاخوان هم اللي كان متسيدين المشهد السياسي في الساحة وقت محمد محمود ومجلس الوزراء , و صقفوا للجنزوري و باعوا الدم و العرض عشان الاستكرار و اتمام خطة الاستيلاء ع البرلمان كاكبر قوة تنظيمية ممولة في الشارع ! في ظل المطادرة الشعبية لرموز الوطني المنحل !!
اثرت فيا ام احد شهداء محمد محمود و هي بتقول .. لو المرشد او مرسي كان نزل شبابهم اللي عمال يرقص لهم في المؤتمرات مع ابني و اصحابه ايام مجلس الوزراء كانوا هيخسروا حاجة ؟! ... اه يا حاجة كانوا خسروا العسكر و البرلمان
مش هكرر كلامي كتير ... لا ينفعنا جزمة و لا استبن , احنا مش بناكل تبن
لسة برضة هتلوموا قلة الاقباط المغيبة المنساقة وراء تجار الدين اللي انتخبوا الفشيق و كانت نسبتهم لا تقارن ضمن جموع الشعب اللي انتخبته عن اقتناع و تاييد مطلق !!! ,,, ع فكرة دا مش دفاع عن الاقباط بقدر ما هو اعادة لوضع الامور في نصابها الصحيح , و التعليق لكم في النهاية
و ستستمر الثورة ... عيش ,, حرية ,, كرامة انسانية
حمدين .. حمدين .. حمدين
Wednesday, May 23, 2012
لحظة من فضلك
هذه الانتخابات تأتيكم برعاية 2000 شهيد ومفقود و 8000 مصاب وفاقد عين ومعاق معذب ومكشوف على عذريتهن و 16000 معتقل - فلا تجعل كل هذا هدرا !!
Friday, May 18, 2012
Thursday, May 17, 2012
النفخه الكبرى لاعلان احمد شفيق الشعبي
اديله في شيكارة .. احمد شفيق .. دا دماغه جبارة .. احمد شفيق
اديله في رغيف .. احمد شفيق .. دا ظريف و لطيف .. احمد شفيق
اديله في ازازة .. يا شفيق .. و كمان بزازة .. يا شفيق
اديله بولبيف .. احمد شفيق .. اديله دا شريف .. احمد شفيق
عملنا انا و انت كدا ثورة .. نزلنا التحرير .. علشان يترشح للريس .. نائب و وزير !
نزلت اتشاهد .. و الشهداء حقهم طار .. علشان يترشح لنا .. واحد عمل المطار !
اديله في كيس .. احمد شفيق .. ليبيعنا رخيص .. احمد شفيق
اديله منافله .. يا شفيق .. يقعد يتسلي .. يا شفيق
اديله ع الريئ .. احمد شفيق .. دا صريح و جرئ .. احمد شفيق
اديله كرتونة .. يا شفيق .. و كمان بالونة .. يا شفيق
و جيلاتي و كولا .. احمد شفيق .. نئبك علي شونة .. احمد شفيق
نزلت اتمرمط .. و اتسمر وسط الميدان .. علشان يترشح لرئاستي .. وزير الطيران !
و علشان الغلابة .. عمل شعبي ذاك الاعلان .. راح طالع عفيفي .. و قام نافخ ذاك الاعلان !
اديله بلوفر .. احمد شفيق .. دا راجل مش اوفر .. احمد شفيق
اديله بونبوني .. احمد شفيق .. دا ذكي و حلزوني .. احمد شفيق
احنا دمنا غالي .. يا شفيق .. بتحلم بالعالي .. يا شفيق
محناش بريالة .. احمد شفيق .. دا احنا رجالة .. احمد شفيق
Tuesday, May 15, 2012
Sunday, May 13, 2012
مشروع نهضة رجال الاعمال
 |
| مشروع نهضة رجال الاعمال الاخواني تصميم - Coptic Revolutionist |
الرأسمالية كما يجب ان تكون
: من هذا المشروع ايضا
و أهم ملامح السياسة المالية التي سوف ننتهجها أنها تسعى إلى خلق بيئة تشجع قطاع خاص ديناميكي ، وتولد النمو القوي وفرص العمل والتقدم والتنمية في مصر
Friday, May 11, 2012
الاخوان و اليهود
 |
| هتلر : لقد كان بوسعي ان اقضي علي كل يهود العالم , لكني تركت بعضاً منهم لتعلموا لماذا كنت أبيدهم المخلوع : لقد كان بوسعي ان اعتقل جميع الاخوان لكني تركت بعضا منهم لتعلموا لماذا كنت اعتقلهم |
Wednesday, May 9, 2012
أبو الفتوح : ساستعين بكل وطني شريف كالمشير طنطاوي
من قلبه و روحه اخوانجي ... و التعريــ(ض) جواه بيجري
أبو الفتوح : ساستعين بكل وطني شريف كالمشير طنطاوي
أبو الفتوح : ساستعين بكل وطني شريف كالمشير طنطاوي
Tuesday, May 8, 2012
تعريف المرحلة الانتقالية
 |
| من مسرحية " مدرسة المشاغبين " 1973 |
تعريف المرحلة الانتقالية
هي المرحلة التي ينتقل فيها اكبر عدد من الثوار الي الرفيق الاعلي
Sunday, May 6, 2012
اغتيال الوعي
لم يعد هناك حاجة للقوة الغاشمة لحمل الشعب على عمل شيء ضد إرادته، حيث يمكن الوصول إلى ذلك بطرق مشروعة وذلك بشل إرادة الشعب عن طريق تغذيته بحقائق مغلوطة جاهزة ومكررة ومنع الناس من التفكير أو الوصول بأنفسهم إلى أحكامهم الخاصة عن الناس والأحداث .
Thursday, May 3, 2012
العمال بين بيادات العسكر وتشويهات الإصلاحيين
العمال بين بيادات العسكر وتشويهات الإصلاحيين
بقلم عمر سليم - 30 أبريل 2012
كان للطبقة العاملة المصرية دور بارز وأساسى فى الإطاحة بالطاغية مبارك خلال الموجة الأولى من الثورة، عن طريق الاحتجاجات الواسعة التي تمثلت فى الإضرابات والاعتصامات التى بدأت فى الظهور فى الثامن من فبراير 2011 بعدد من المؤسسات منها روزاليوسف والتلفزيون المصرى، ولكنها تصاعدت بشكل مثير فى اليوم التالى حيث حاصر آلاف العمال مقر محافظة كفر الشيخ وأحرقوا مقر القوى العاملة، كما دخل عمال المصانع البترولية مثل بيروتريد وبترومنت وإبيسكو والتعاون وأنابيب البترول فى إضراب واسع مطالبين بإسقاط وزير البترول. كما شارك أيضاً فى الإضرابات عمال ورش بولاق وورش كوم أبو راضي وعمال شركة مياه الشرب والصرف الصحى بالقاهرة والنقل العام وهيئة قناة السويس، إلخ. وقد تجاوز عدد الإضرابات خلال هذا الشهر الـ450 إضراباً، وهكذا يتضح كيف تمكنت الطبقة العاملة من تقويض النظام وتتويج نضالها بتوجيه الضربة القاضية التى أطاحت بالديكتاتور مبارك.
ثم انخدع البعض وظنوا أن الثورة حققت أهدافها وانصرفوا إلى بيوتهم، ولكن الطبقة العاملة لم تنخدع وظلت تناضل فى طليعة قوى الثورة، وتقف فى مواجهة قمع العسكر والإصلاحيين الذين لا يكفون عن تشويه الحراك العمالي، فتارة ينعتونه بالفئوي وتارة يصفونه بالثورة المضادة. وبرح الخفاء عما يضمره العسكر من معاداة للطبقة العاملة عندما أصدرت حكومة شرف فى الثالث والعشرين من مارس 2011 مرسوماً بقانون يقضى بتجريم الإضرابات والاعتصامات فى ظل حالة الطوارئ. لكن العمال لم يكترثوا بهذا القانون وحولوه إلى مجرد حبر على ورق؛ إذ تصاعدت وتيرة الاحتجاجات العمالية حتى بلغت ذروتها فى سبتمبر الماضى خلال إضراب النقل العام والأطباء والمعلمين والمصرية للاتصالات وغيرها من الاحتجاجات التى جعلت بوادر الإضراب العام تلوح فى الأفق.
ولم يكتف المجلس العسكرى بذلك القانون الجائر وبحملات التشويه الواسعة، بل أنه لجأ إلى سياسات أكثر وحشية فى التعامل مع الحركة العمالية الصاعدة. ففى أبريل 2011 تم تقديم 22 عامل للمحاكمة العسكرية، وفى مارس 2012 تم اعتقال 5 من من الرؤساء البحريين فى الشركة العربية لأنابيب البترول (سوميد) بعد الإضراب الذى نظموه فى 7 مارس الماضي. كما تم التعامل مع إضراب النقل العام فى مارس 2012، بعدد عماله البالغ 45 ألفاً فى أكثر من 30 جراج، بطريقة مستفزة تهدف لكسر الإضراب؛ فبدلاً من الاستجابة لمطالب آلاف العمال المضربين، قامت القوات المسلحة بنشر أوتوبيسات الجيش لحل الأزمة وتم تجاهل مطالب العمال المضربين.
والعمال لا يواجهون المجلس العسكرى وحده، ولكنهم أيضاً يقفون فى وجه الإصلاحيين وأبواقهم الإعلامية الفاسدة التى لاتزال تشوه الحركة العمالية الصاعدة؛ فتارة يصفون الإضرابات العمالية بالاحتجاجات الفئوية، و تارة بتعطيل عجلة النتاج التى أصبحت الفزاعة التى دائماً ما يلعب الإعلام على وترها، وتارة باتهام العمال المضربين بالعمل وفقا لأجندات أجنبية لزعزعة الاستقرار.
ويُظهر هذا الفزع كيف أن درجة النضالية والصلابة والوعي التي تتمتع بها الطبقة العاملة المصرية لا ترعب فقط رجال الأعمال وأصحاب الشركات الكبرى في مصر وحسب، بل أنها تقض مضاجع القوى الرأسمالية الأكبر في العالم خوفاً على استثماراتهم وأرباحهم.
العمال إذن يواجهون العسكر ببياداتهم ومحاكمهم العسكرية الظالمة وقوانينهم الجائرة، والإصلاحيين بأحزابهم وأبواقهم الإعلامية. العمال يقفون فى طليعة قوى الثورة ساعين إلى تجذيرها وتصعيدها إلى ثورة اجتماعية تقتلع النظام من جذوره وتطيح بتحالف العسكر مع الإصلاحيين. وهم بخبرتهم النضالية التى اكتسبوها منذ صعود الحركة العمالية فى 2006 قادرين على اقتلاع النظام، وبناء الدولة التى تعمل لمصلحتهم ويقررون فيها مصيرهم بأنفسهم.
 |
| The three great problems of this century; the degradation of man in the proletariat, the subjection of women through hunger, the atrophy of the child by darkness. Victor Hugo |
Wednesday, May 2, 2012
Subscribe to:
Comments (Atom)